Quesaquò e Mascomprès

Presentacion

Creacion jove public de 2015

Un qüatuor inventiu !

AFFICHE

Quesaquò e Mascomprès son dos amics acompanhats de Marchadedins e dau Chivau Drapèu, dos companhons pas coma los autres. Lo Chivau Drapèu es un chivau legendari que i agrada contar d’istòrias. Marchadedins, èu, pantaissa de poder cavalgar un jorn. Marchadedins seguís sempre Quesaquò mentre que aiceste, curiós de tot, quita pas de pausar de questions a Mascomprès, cercaire de responsas e inventor de tria.

Mas lors aventuras seràn compromesas en causa dau Glomi ! Eu aborrís los contes e las invencions ! Tot racionalizar, numerotar, rendre eficaç… Vaquí son unica tòca ! Vòl escafar totas las istòrias e los noms de causas puòi que « servisson a pas res » ! Lo Glomi va raubar

Marchadedins, esperent tocar lo Chivau Drapèu per que pòsca pas pus contar d’istòrias ! Son plan malefic es en plaça ! Cossí nòstres amics Quesaquò e Mascomprès capitaràn de recuperar lor companh e de i faire una bona leçon au Glomi?

Per un jòc barrutlaire, una maquina de teatre !

La mesa en scèna d’aqueste espectacle vira en màger part a l’entorn dau cariolet (o maquina de teatre). Aqueste engenh es l’element principal de la pèça. Creat especialament per la pèça, s’agís d’un tricicle entierament tornar faiçonat per l’ocasion. Cargat de mantun tirradors e d’una ombrèla, los dos comedians faiçonan lor jòc segon ço que ne’n sortisson. Lo cariolet a doncas un ròtle dramaturgic fòrça important. Gràcias an aquò l’espectacle ven burlesc e plen de suspresas… Dins la pèça, dos mondes se destrian. Lo mond de Quesacò e Mascomprès e aquel dau Glomi. Aquel atribuit au Glomi es ordonat e exigent. Un mond ont lo gris es la sola color de l’arcolan e ont tota causa ten sa plaça e son utilitat. Au contrari d’aquel de Quesaquò e Mascomprès qu’es fòrça mai leugièr, risolièr e creatiu, repausant sus l’element principau de la pèça, lo famós cariolet.

QM

Lo jòc « Quesaquò e Mascomprés »

Consistís en inventar d’expressions o d’escais­nom risolièrs en occitan. Lo jòc es estat prepausat a las Calandretas qu’an vist l’espectacle. Aquesta idèa es fondada sus un tèxte de la pèça ont los dos camaradas se garrolhan. Aitau, los dròlles podián dintrar mai aisidament dins l’univèrs de la pèça en jogant lo ròtle das protagonistas. Las expressions registradas nos son estat mandadas per que nòstres dos jurats, Yves Durand e Jean­Louis Blénet, pòscan despartir los grands ganhaires d’aqueste concors !

 

Distribucion

  • Escritura, mesa en scèna : Jean louis Blénet
  • Comedians: Jean louis Blénet, Yves Durand
  • Costumes e accessòris : Sûan Czepczynski
  • Affichas, fotografias : Fabrice Favel

Dorsièr de premsa Particion de telecargar