Trasses de Traces, La Cévenante
Residéncia de creacion 2006 / 2008
Partenariat Federacion dels Fogals Rurals de Losèra / La Rampe TIO
Presentacion del trabalh dins l'encastre del festenal Contes et rencontres en Losèra.

Occitània, 1000 ans d'istòria ! E abans ? Era pas ja dins la semença, ela e
la destinada que portam en nosautres ?

Un còp èra, i a 5 000 ans, lo país de las 3 dralhas... Aquò èra 3 pistas prautidas per la salvagina que montava-davalava entre montanha e mar, 3 pistas que los caçaires e puèi los pastres endralhèron a son torn... per far de nòstre miègjorn un dels sitis megalitics los mai fertils del mond. De qué ne demòra d'aquela preïstòria ?

Lo TIO s'aventura sus de "trasses de traces" que daissèron los pastres e las fadas, los gigants e los gavaches / gavòts. L'abans-correire d'aquel descobriment es DEGUS, un deslocalizat de la darrièra entrepresa cevenòla que s'encontra entrapadelat per un país tot. Perqué la Cevena es una trapèla ?... Perque es l'inconscient de DEGUS e a l'encòp aquel "erm", aquel "refugi", aquel "maquís" que los Lengadocians d'abans e d'aprèp Lengadòc i deguèron e deuràn descobrir o tornar descobrir los espleches de la libertat.

Aquel DEGUS d'ara sap pas grand causa d'aquel passat mas se va acaminar. Desrevelharà contes e legendas del país e benleù ben sa destinada dins aquel rebaladís de fadas, de vièlhas, d'ANPE o d'impòrt-expòrt. Plan-planet, las mascas tombaràn e l'emmascat trobarà dins lo temple natural qu'es la Cevèna un “de-que-far-de-sa-vida”.

Dos actors nos contan aquela istòria : aquel que representa DEGUS e aquela que jòga las 3 fadas del país de las 3 dralhas. Los passaires a travèrs del temps e de las dralhas son 2 musicians. Una tela permet tanben de "multi-media-tizar" de païsatges.

La Residéncia

La residéncia s'es debanada a Vebron e lo trabalh endralhat comencèt en setembre de 2006 per s'acabar en febrièr de 2008. La creacion foguèt presentada :
lo dimècres 13 de febrièr de 2008 a la sala de las fèstas de Meyrueis
lo dijòus 14 de febrièr al temple de St Martin de Boubaux
lo divendres 15 de febrièr al temple de Vebron

En mai de l'espectacle, d'autras accions foguèron mesas en òbra dins l'encastre d'aquela residéncia, notadament de velhadas rescontres, un estagi "Contaires del país" e una conferéncia. De passejadas contadas tanben foguèron organizadas en setembre dins l'encastre del festenal natura del Pargue Nacional de las Cevenas.

Amb

Escritura e mesa en scèna : Claude Alranq
Comedians : Claude Alranq, Véronique Valéry
Musicians : René Huré, Hervé Robert