String Security

Presentacion

STRING SECURITYEspectacle eventualament disponible a la demanda, per de serias de representacions.

La Capitolessa es prens !

Dins un país imaginari ultra-securitari, la Capitolessa per de rasons de precaucion fa portar son nenon per sa serviciala, jove emigrada creòla : Kasia. Per mestrejar l’emprenhament, una bralheta de seguretat vestís Kasia : es lo “String Security” ! Lo futur papà, lo Sénher Capítol, es, per çò que lo concernís, concentrat sus son projècte socio-politic novèl : “Total Festum, Midi go on the spree!” Quin programa…

En rèire-plan, un conflicte generacional apareis : lo paire del Sénher Capítol, e donc futur grand, desvolopa un movement de resisténcia amb lo misteriós F.R.O.C. Aqueste còp, solide, lo F.R.O.C. farà chòc ! Mai que mai, lo nis d’amor del Sénher Capítol es en dangièr…

La Rampe TIO e Claude Alranq

Per la companhiá, aquesta creacion novèla fa part d’una logica de desvolopament d’un teatre d’Oc contemporanèu. 20 ans de collaboracion amb Claude Alranq an permés de dobrir d’espandis novèls per la creacion teatrala en tornar prene las formas popularas, comicas e tragicas del patrimòni occitan.

Claude Alranq prepausa aquí sa 34ena creacion en 36 ans de mestièr. Amb String Security, respond a las urgéncias dels païses de cultura d’Oc :

  • Trasmetre un patrimòni viu de saber-viure e de biais d’èsser a lors enfants
  • Trasmetre mai largament una cultura “ni mai locala o universala que las autras”, una cultura menaçada.

Un teatre de fièra

L’estetica del teatre de fièra ofrís a l’espectator a l’encòp lo plaser d’una istòria mas tanben lo plaser de veire l’actor petar lo fuòc dins totas las situacions. Fantasiá explosiva ont los actors-personatges-fòls bombisson entre las còrdas e las pelhas per se quichar l’imaginari, String Security es la promessa d’un espectacle rasclant e descabestrat que mescla los ressòrts sus un ritme desalenat.

Distribucion

  • Escritura e mesa en scèna : Claude Alranq
  • Scenografia : Christian Coulomb
  • Creacion musicala electro-acostica : André Dion
  • Creacion lum, regia platèu : Bruno Matalon
  • Regia lum : Magali Noulin
  • Costums : Rosario Alarcon, Céline Arrufat
  • Creacion colhandras : Nathalie Barthe
  • Coordenacion generala : Véronique Valéry
  • Fotografs : Marc Ginot et Laurent Pidancet
  • Comedians : Marie Coumes, Claude Alranq, Véronique Valéry, Marie-Pierre Loncan, Igor Bernardic, Jean-Louis Blénet

PremsaDorsièr PedagogicFicha tecnica