Mistral Tout ou Rien

Presentacion

Mistral Tout ou RienEspectacle eventualament disponible a la demanda, per de serias de representacions.

Pendent l’annada de 2004, mantuna manifestacion an festejat lo 100en aniversari de son prèmi Nobel de Literatura. Per mièlhs comprene çò que s’escond darrièr aquela glòria divèrsament coneguda, la companhiá montèt un cabaret poetic e musical en partir d’un tèxt d’Yves Rouquette que presenta los aspèctes màgers de la vida e de l’òbra del “Mestre de Maiano”.

Cabaret poetic e musical

L’espectacle debana amb umorisme e biais las etapas bèlas d’una escritura, d’una vida. Dins un encadenament ritmat de cançons, de scenetas, d’extraches de l’òbra de Mistral, òm passa sens dificultat de la fantasiá a l’emocion, de l’Istòria a la Poësia.

Espectacle bilingue

Permet a totes de tastar las anecdòtas de la vida del poèta, de li cambareleto de son enfancio populario fins a son prèmi Nobel. Es tanben l’escasença de descobrir l’escritura ufanosa d’un poèta màger de l’Euròpa occidentala amb d’extraches de Mireio, Calendau, Lo Poemo dou Rose…

Descobèrta del continent Mistral

Al començament, coma per fòrça de nòstres contemporanèus, Frédéric Mistral èra pas qu’una coneissença fosca e mal determinada. Un mite poscós cargat dels a priori los mai extrèms, dins lo regèt o la passion. Yves Rouquette nos a guidat sus aquelas tèrras desconegudas. De mercé sa coneissença e son estrambòrd, esclairèt nòstre camin, atissat nòstra curiositat, e sèm partits a la descobèrta del continent Mistral : un territòri immens, comol de suspresas e d’emocion, sovent a contrapè de l’imatge vielhòt carrejat.

Còla de creacion

Per contar totas aquelas riquesas, los comedians Bruno Cécillon, Gilles Buonomo e Emmanuel Valeur jògan, dansan e cantan sus las nòtas del musician Frédéric Fortès. Dins un espaci liure de tot artifici, un piano e una caissa de malícia farandolejan jol lum. La mesa en scena d’Isabelle François balha lo tempo e renòva nòstre agach sul poèta, aital coma per las illustracions e l’aficha de Pierre François, lo pintor de l’escòla setòria.

Fin finala, un espectacle que fa vistalhar tot Mistral en 1h20 ! De segur l’apròcha es pas completa, aürosament ! Mas amb aquesta clau, La Rampe TIO vos dobrís la pòrta “del jardin Mistral”. Mistral Tout ou Rien, es atanben una aisina pedagogica pels collegians e liceans, qu’aital pòdon aprochar un monument de la literatura del sègle XIXen que marquèt Provença, França e Euròpa.

Distribucion

  • Escritura : Yves Rouquette
  • Mesa en scèna : Isabelle François
  • Comedians : Gilles Buonomo, Bruno Cécillon, Emmanuel Valeur
  • Creacion musicala : Frédéric Fortès
  • Creacion grafica : Pierre François
  • Regia platèu : Sergio Perera
  • Regia lum : Igor Bernardic, Sergio Perera
  • Partenariat : Le Félibrige
  • Coordenacion generala : Bruno Cécillon
  • Fotograf : Marc Ginot

Dorsièr PedagogicFicha tecnica