35 ans de produccions professionalas
Quitament 60 creacions teatralas
Mai de 5000 representacions publicas

Creada en 1974, La Rampe TIO es una companhiá professionala que quilhèt la cultura occitana al nogal de son camin artistic. Sus aquelas amiras, fa espelir una creacion forta, originala, diversa, per un public finòt, aluserpit, appassionat de descobèrtas e per una popu-
lacion volontosa de tornar trapar l'èime e los biaisses d'una lenga e d'una cultura milenari. Amb aquel sicut cultural, La Rampe TIO porgís al mond un agach singular de la societat, una actitud engatjada en resisténcia a la mondialisacion de la pensada unenca.

Patrimòni e Creacion contemporanèa son los menaires de nòstre faire per far descobrir las òbras majers del teatre d'òc e far conéisser l'escritura dramaturgica occitana contemporanèa. Mercés a nòstra dobertura als autors, creators, meteires en scèna de vejaires diferents, podèm endralhar camins desconeguts per la creacion occitana. Los succes publics e una difusion excepcionala per
una companhiá independenta (120 a 130 representacions annadieiras, totes espectacles mesclats) validan la pertinéncia de nòstra causida.

Per afortir son identitat, lo Théâtre LA RAMPE se cambièt lo nom en LA RAMPE TIO, Teatre Inter-
regional Occitan. Aquò marca l'endevenir de la companhiá en precisar son espandi real d'accion e de difusion : "un Teatre d'òc pels países d'òc, per dire dins son ample tota la riquesa del teatre d'òc d'ièr, de uèi e de deman."

Albergat dins los ancians entrepaus "Vergne" a Montpelhièr, la companhiá es al nogal d'un vam de creacion e de renovelum de la dinamica occitana qu'imatgina e bastís ambe las associacions, los estudiants, los medias novèls, la societat de deman.

Creacion, difusion e tanben formacion !
Amb Claudi Alranc, meteire en scèna, escrivan, comedian e ancian director del Despartament Arts de l'Universitat de Niça-Sophia Antipolis, la companhiá a creat en 1999 la "Licence Professionnelle Acteurs Sud". Aquela foguèt la primièra licéncia professionala artistica creada en França dins lo domeni de las culturas meridionalas. Aquela pratica sotalinha lo nòstre interest per de projectes
de formacion que la companhiá engimbra regularament ambe d'estudiants, d'actors e de creators.

Transmetre, renovelar, inventar una creacion occitana per uèi e per deman son las amiras de La Rampe TIO. "Per un Teatre del país d'òc."